რა წავიღოთ სამშობიაროში?

ორსულობის ბოლო კვირები მოლოდინითა და სასიამოვნო მღელვარებით არის სავსე. პატარასთან შეხვედრის დღე რომ მოახლოვდება, წინასწარ მომზადებული სამშობიარო ჩანთა ბევრ ზედმეტ ნერვიულობას აგარიდებთ. მისი ჩალაგება უმჯობესია ორსულობის 34-36-ე კვირისთვის დაასრულოთ, რათა საჭირო ნივთები ერთ ადგილზე გქონდეთ და ბოლო წუთს არაფრის ძებნა აღარ დაგჭირდეთ.

თუ პირველად ემზადებით მშობიარობისთვის, ეს ჩექლისტი დაგეხმარებათ, ეტაპობრივად მოამზადოთ როგორც ბავშვისთვის, ისე – საკუთარი თავისთვის საჭირო ნივთები.

1. ახალშობილის სამოსი

პირველი დღეებისთვის შეარჩიეთ რბილი, ჰაერგამტარი ქსოვილისგან დამზადებული ტანსაცმელი, რომელიც ბავშვის ნაზ კანს არ გააღიზიანებს და ადვილად ჩააცვამთ.

• 3–4 კომპლექტი – ბოდე ან სხვა კომფორტული სამოსი, რომელიც მარტივად იხსნება და იკვრება;
• 2–3 ქუდი – თხელი და რბილი ქუდები;
• 2–3 წყვილი წინდა – სასურველია რბილი და თავისუფალი რეზინით;
• ხელთათმანები – თუ ბავშვის ფრჩხილები გრძელი იქნება, რბილი ხელთათმანები სახის შემთხვევითი დაკაწვრის თავიდან აცილებაში დაგეხმარებათ;
• პლედი – სეზონის შესაბამისად შეარჩიეთ თხელი ან უფრო თბილი პლედი, რომელიც ბავშვისთვის კომფორტული იქნება.

2. დედის კომფორტი და მოვლა

სამშობიაროში ყოფნისას კომფორტული ტანსაცმელი და პირადი ჰიგიენის ნივთები განსაკუთრებით მნიშვნელოვანია. წინასწარ მომზადებული ნაკრები ყოველდღიურ რუტინას გაგიმარტივებთ.

• 2 სამშობიარო ან მეძუძურის პერანგი – შეარჩიეთ მოდელი, რომელიც წინა მხრიდან იხსნება ან სპეციალური ჭრილი აქვს ძუძუთი კვებისთვის;
• ხალათი და ჩუსტები – მსუბუქი ხალათი და კომფორტული, მოცურების საწინააღმდეგო ძირის მქონე ჩუსტები;
• 2 მეძუძურის ბიუსტჰალტერი – რბილი მოდელები, რომლებიც დისკომფორტს არ შეგიქმნით;
• მშობიარობის შემდგომი საფენები და საცვლები – მათი რაოდენობა წინასწარ გადაამოწმეთ სამშობიარო კლინიკის მოთხოვნების მიხედვით;
• მკერდის საფენები – განსაკუთრებით გამოგადგებათ ძუძუთი კვების დაწყების შემდეგ;
• პირადი მოვლის ნივთები:  კბილის ჯაგრისი და პასტა, შამპუნი, შხაპის გელი, სავარცხელი, დამატენიანებელი კრემი და ტუჩის ბალზამი.

3. ბავშვის ჰიგიენის ნივთები

ახალშობილისთვის განკუთვნილი ნივთები ცალკე ჩანთაში ან ორგანიზერში მოათავსეთ, რათა საჭირო ნივთის მოძებნა მარტივად შეძლოთ.

• ახალშობილის საფენები – ჩვეულებრივ, 0-1 ზომა გამოიყენება, თუმცა არჩევანი ბავშვის სავარაუდო წონის მიხედვით გააკეთეთ;
• სველი ხელსახოცები – შეარჩიეთ ახალშობილისთვის განკუთვნილი, უსუნო და ალკოჰოლის გარეშე;
• საფენის ქვეშ წასასმელი დამცავი კრემი – სასურველია, ფორმულა ნაზი და ბავშვის კანისთვის შესაფერისი იყოს;
• რბილი პირსახოცი – კაპიუშონიანი პირსახოცი განსაკუთრებით მოსახერხებელია ბავშვის დაბანის შემდეგ.

4. საბუთები და აუცილებელი ნივთები

ჩანთის ყველაზე თვალსაჩინო განყოფილებაში მოათავსეთ ის ნივთები, რომელთა მოძებნაც ნებისმიერ მომენტში შეიძლება დაგჭირდეთ.

• პირადობის მოწმობა/პასპორტი;
• ორსულობის მიმდინარეობასთან დაკავშირებული სამედიცინო დოკუმენტები, ანალიზები და გამოკვლევების პასუხები;
• ტელეფონი და დამტენი – გრძელი კაბელი განსაკუთრებით მოსახერხებელია, თუ დენის წყარო საწოლიდან შორსაა.

სამშობიარო ჩანთის დროულად მომზადება ბოლო კვირებს უფრო მშვიდსა და ორგანიზებულს გახდის. აუცილებლად წინასწარ შეამოწმეთ, რომ ყველაფერი ჩალაგებული გაქვთ, რათა მშობიარობის მოახლოებისას მხოლოდ საკუთარ თავსა და პატარასთან შეხვედრისთვის მოემზადოთ.