როგორ შევაყვაროთ ბავშვს კითხვა?

ბავშვისთვის წიგნი თავიდანვე სასიამოვნო აღმოჩენად რომ იქცეს, კითხვა ვალდებულებას არ უნდა ჰგავდეს. განსაკუთრებით დასვენების პერიოდში, როცა გაკვეთილები დასრულებულია და ბავშვს მეტი დრო რჩება თამაშისთვის, მეგობრებთან ურთიერთობისა და საყვარელი საქმიანობისთვის, წიგნის ხელში აღება შესაძლოა არც ისე მიმზიდველი იყოს.

ამასთანავე, კითხვის ჩვევის ჩამოყალიბება ყოველდღიურად დიდი მოცულობის ტექსტის წაკითხვას არ გულისხმობს. გაცილებით მნიშვნელოვანია, წიგნთან ურთიერთობა ბავშვისთვის საინტერესო და სასიამოვნო გამოცდილებად იქცეს.

კითხვის სიყვარული ბავშვობიდან იწყება

წიგნებთან ურთიერთობის დაწყება სასკოლო ასაკამდე ბევრად ადრე შეიძლება. ზღაპრის მოყოლა, ილუსტრაციების ერთად დათვალიერება ან ძილის წინ რამდენიმე გვერდის წაკითხვა ბავშვისთვის ბუნებრივ რუტინად შეიძლება იქცეს.

ამ პროცესში მშობლის მაგალითსაც დიდი მნიშვნელობა აქვს. თუ ბავშვი ხედავს, რომ უფროსები თავადაც კითხულობენ და წიგნი მათი ყოველდღიურობის ნაწილია, ლიტერატურის მიმართ ინტერესიც უფრო ბუნებრივად უჩნდება.

მიეცით არჩევანის უფლება

ყველა ბავშვს ერთი და იგივე წიგნი ვერ დააინტერესებს. ერთს თავგადასავლები მოსწონს, მეორეს – ცხოველებზე მოთხრობები, მესამეს კი – ფანტასტიკური ისტორიები.

ამიტომ სასურველია, ბავშვს თავად შეეძლოს წიგნის არჩევა. მშობელს შეუძლია რამდენიმე ვარიანტი შესთავაზოს და ერთად დაათვალიერონ, თუმცა საბოლოო გადაწყვეტილებაში ბავშვის ინტერესების გათვალისწინება მნიშვნელოვანია.

როცა პატარა თავად ირჩევს საკითხავს, წიგნი მისთვის დავალების საზღვრებს სცდება  და მასში ცნობისმოყვარეობაც უფრო მარტივად იღვიძებს.

დაიწყეთ მცირე დროით

კითხვის ჩვევის შესაქმნელად აუცილებელი არ არის დღეში ერთი საათის გამოყოფა. განსაკუთრებით დასაწყისში, 10–15 წუთიანი მშვიდი კითხვის დრო სრულიად საკმარისი შეიძლება იყოს.

მთავარია, ბავშვი არ გადაიღალოს და კითხვა მისთვის უსიამოვნო ვალდებულებად არ იქცეს. დროთა განმავლობაში რამდენიმე წუთი შესაძლოა საკმარისი აღარ აღმოჩნდეს და თავად მოუნდეს ისტორიის გაგრძელება.

მოარგეთ წიგნი ბავშვის ინტერესებს

საყვარელი ცხოველები, სპორტი, კოსმოსი, ზღაპრები, მოგზაურობა თუ ზღაპრული სამყარო – ბავშვის თითქმის ნებისმიერი ინტერესი შეიძლება წიგნის არჩევის საწყის წერტილად იქცეს.

მნიშვნელოვანია, რომ წიგნი ბავშვის ასაკსა და ინტერესებს შეესაბამებოდეს და კითხვის პროცესი ზედმეტმა წნეხმა არ დაჩრდილოს.

გახსოვდეთ, რომ კითხვის სიყვარული ერთ დღეში არ ყალიბდება. თავისუფალი არჩევანი, მშვიდი გარემო, საინტერესო წიგნები და უფროსის პირადი მაგალითი ბავშვს თანდათან ეხმარება, წიგნი ყოველდღიური ცხოვრების ბუნებრივ ნაწილად აქციოს. ყველაზე მნიშვნელოვანია არა ის, რამდენ გვერდს წაიკითხავს თქვენი პატარა, არამედ ის, როგორი ემოცია დარჩება მას წიგნთან ურთიერთობისგან.