დედობა და კარიერა – ოქროს შუალედი
დედობა ადამიანის ცხოვრებაში ბევრ რამეს ცვლის. ბავშვის დაბადებასთან ერთად იზრდება პასუხისმგებლობა, იცვლება ყოველდღიური რუტინა და ხშირად პირადი ინტერესები მეორე ადგილზე გადადის. დედები დიდ დროსა და ენერგიას შვილების აღზრდას უთმობენ, თუმცა წლების შემდეგ, როცა ბავშვები დამოუკიდებლები ხდებიან, შესაძლოა აღმოაჩინონ, რომ საკუთარი სურვილებისა და ინტერესებისთვის დიდი ხანია ყურადღება აღარ მიუქცევიათ.
სწორედ ამიტომ მნიშვნელოვანია, ოჯახზე ზრუნვის პარალელურად პიროვნული განვითარების შესაძლებლობაც შევინარჩუნოთ. შესაძლოა, ეს პროფესიული საქმიანობის გაგრძელება, ახალი ჰობის აღმოჩენა ან ძველი გატაცების განახლება იყოს. სანდრა რულოვსი ამ საკითხზე საუბრისას დედის მაგალითს იხსენებს: როდესაც ის და თავისი ძმა სტუდენტები გახდნენ, დედამ ხელოვნებას დაუბრუნდა, რომელსაც ქორწინებამდე დიდ დროს უთმობდა. ეს გამოცდილება გვახსენებს, რომ პირადი ინტერესებისადმი დაბრუნება ცხოვრების ნებისმიერ ეტაპზეა შესაძლებელი.
ოჯახისა და კარიერის შეთავსების ერთ-ერთი გზა მოქნილი სამუშაო გრაფიკია, როდესაც ამის შესაძლებლობა არსებობს. სამუშაოსა და საოჯახო პასუხისმგებლობების დაბალანსება განსაკუთრებით მნიშვნელოვანია მშობლებისთვის, რომელთაც სურთ, შვილებთან საკმარისი დრო გაატარონ და, ამავდროულად, საკუთარი პროფესიული მიზნებიც განავითარონ.
საქართველოში ბავშვების ყოველდღიურობა ხშირად სხვადასხვა წრით, სპორტული აქტივობითა და დამატებითი მეცადინეობით არის დატვირთული. ამ განრიგის ორგანიზება მშობლებისგან დიდ დროსა და ენერგიას მოითხოვს. ასეთ პირობებში განსაკუთრებით მნიშვნელოვანია დროის სწორად განაწილება და ოჯახის წევრებს შორის პასუხისმგებლობების გაზიარება.
სანდრა რულოვსი ყურადღებას ამახვილებს კიდევ ერთ მნიშვნელოვან საკითხზე – ბავშვებმა უნდა დაინახონ, რომ მშობლებსაც აქვთ საკუთარი საქმე, პროფესიული ვალდებულებები და პირადი ინტერესები. ამგვარი მაგალითი მათ პასუხისმგებლობის, დამოუკიდებლობისა და დროის მართვის უნარების განვითარებაში ეხმარება. ამასთან, ბავშვებისთვის მნიშვნელოვანია იმის ცოდნაც, რომ მშობლები მათ გვერდით იქნებიან და მათთან ერთად დროის გასატარებლად შესაძლებლობას ყოველთვის გამონახავენ.
ოჯახსა და კარიერას შორის ოქროს შუალედის პოვნა ყოველდღიური არჩევანისა და პრიორიტეტების გააზრებას გულისხმობს. როდესაც ადამიანს შეუძლია, სხვადასხვა როლი ერთმანეთს შეუთავსოს და საკუთარი ინტერესებისთვისაც გამონახოს დრო, ცხოვრება უფრო მრავალფეროვანი და სრულფასოვანი ხდება. მთავარია, ამ პროცესში არც ოჯახური ურთიერთობები დავივიწყოთ და არც საკუთარი თავი დავკარგოთ.
