შიში მშობიარობის წინ – როგორ დავამარცხოთ ის?
მშობიარობა უნიკალური და ემოციური ეტაპია ქალის ცხოვრებაში, თუმცა ამ ბედნიერ მომენტს ხშირად თან სდევს შიში, გაურკვევლობა და შინაგანი დაძაბულობა. მომავალი დედებისთვის ჩვეულებრივი ამბავია, განიცდიდნენ შიშს ტკივილის, მშობიარობის პროცესის სირთულეებისა ან პოსტსამშობიარო პერიოდის მიმართ, რადგან ეს ცვლილებები როგორც ფიზიკურ, ისე ემოციურ მზაობას მოითხოვს.
შიშის დაძლევა შესაძლებელია შესაბამისი მომზადებით და პოზიტიური მიდგომით. მნიშვნელოვანია, რომ მომავალი დედა კარგად იცნობდეს მშობიარობის პროცესს, სხვადასხვა მეთოდს ტკივილის შესამსუბუქებლად და მშობიარობის შემდგომი პერიოდის თავისებურებებს. როგორ დავძლიოთ შიში და მოვემზადოთ მშობიარობისთვის ისე, რომ ეს გამოცდილება მშვიდი და დადებითი იყოს? – ამ კითხვებზე პასუხს ამ ბლოგში აღმოაჩენთ.
ყველაზე გავრცელებული შიშები
ტკივილის შიში
არაერთი ქალი ფიქრობს, რომ მშობიარობა აუტანლად მტკივნეული იქნება. მნიშვნელოვანია, გვესმოდეს, რომ არსებობს მრავალი გზა ტკივილის შესამსუბუქებლად – ეს შეიძლება იყოს სუნთქვითი ვარჯიშები, მედიტაცია, ფიზიოლოგიური მშობიარობა წყალში და სხვ.
მშობიარობის გართულებების შიში
მიუხედავად იმისა, რომ ნებისმიერი სამედიცინო პროცესი გარკვეულ რისკებთანაა დაკავშირებული, თანამედროვე მედიცინა წარმატებით მართავს მშობიარობას, რაც მას უფრო უსაფრთხოს და პროგნოზირებადს ხდის. მნიშვნელოვანია, ორსულობის განმავლობაში ექიმთან რეგულარული კონსულტაციები გაიაროთ და დეტალურად გაეცნოთ მშობიარობის გეგმას.
სამშობიარო პროცესზე კონტროლის დაკარგვის შიში
მშობიარობის პროცესის ბუნებრივი სირთულეების გამო ბევრ ქალს აწუხებს შიში, რომ ვერ გააკონტროლებს საკუთარ სხეულს ან ემოციებს. ამ განცდის დაძლევაში დაგეხმარებათ სანდო ინფორმაციის მიღება და წინასწარ მომზადება, რაც უფრო კარგად გაეცნობით საჭირო საკითხებს, მით უფრო მშვიდად და თავდაჯერებულად შეხვდებით ამ განსაკუთრებულ მომენტს.
პოსტსამშობიარო პერიოდის შიში
მომავალი დედებისთვის სრულიად ბუნებრივია მღელვარება იმის გამო, თუ როგორ გაუმკლავდებიან ახალშობილზე ზრუნვას. გახსოვდეთ, რომ ეს ეტაპი გამოცდილებასთან ერთად მარტივდება. წინასწარ ფსიქოლოგიურად და ინფორმაციულად მომზადება და ოჯახის მხარდაჭერა მნიშვნელოვანი რგოლებია ამ პერიოდის წარმატებულად გადალახვაში.
მშობიარობის შიშები ბუნებრივი მოვლენაა, თუმცა მათთან გამკლავება შესაძლებელია. მთავარია, რომ იყოთ ინფორმირებული, მხარში გედგეთ საყვარელი ადამიანები და ენდოთ საკუთარ სხეულს. ყოველი ორსული ქალი ისევე უნიკალურია, როგორც მისი გამოცდილება – და ეს მომენტი თქვენს ცხოვრებაში აუცილებლად იქნება ერთ-ერთი ყველაზე საოცარი და დასამახსოვრებელი.
