როგორ დავიცვათ ბავშვი ტკიპებისგან?
ზაფხულის სეზონზე ბუნებაში დროის გატარება განსაკუთრებით აქტუალურია, თუმცა ამ პერიოდს თან ახლავს დაავადება ბორელიოზის (ლაიმის დაავადების) რისკი, რომელიც ტკიპების საშუალებით გადადის. ამ თემასთან დაკავშირებით საზოგადოებაში რამდენიმე გავრცელებული შეცდომა არსებობს. პირველი მცდარი შეხედულება ისაა, რომ ბორელიოზის საფრთხე შინაური ცხოველების ტკიპებს უკავშირდება. რეალურად, ძაღლისა და კატის ტკიპები ამ მხრივ საშიში არ არის. ბორელიოზის გადამტანია ძალიან წვრილი ტკიპა, რომელიც ბუნებაში, ძირითადად ბალახში ბინადრობს. ბავშვები და მოზრდილები ინფიცირების რისკის ქვეშ სწორედ მაშინ ექცევიან, როდესაც გარეთ, მწვანე ზონებში სეირნობენ ან თამაშობენ.
ინფექციისგან თავდასაცავად მთავარი რეკომენდაცია სწორი ჩაცმულობაა. მიუხედავად იმისა, თუ რამდენად ცხელა ან დისკომფორტულია ეს ზაფხულში, ბუნებაში გასვლისას როგორც ბავშვებს, ისე დიდებს ფეხზე უნდა ეცვათ წინდა და დახურული ფეხსაცმელი, ასევე სხეული დაფარული უნდა იყოს გრძელი შარვლითა და გრძელსახელოებიანი ტანსაცმლით. ეს მნიშვნელოვანწილად გვიცავს, თუმცა აბსოლუტური გარანტია არ არსებობს. ამიტომ გარეთ ყოფნის შემდეგ აუცილებელია, რომ მშობელმა ბავშვის მთელი ტანი დეტალურად დაათვალიეროს, რადგან მწერი შეიძლება ნებისმიერ ადგილას იყოს ჩამჯდარი.
ამ დროს უმთავრესი ფაქტორი დროა – რაც უფრო დიდხანს არის ტკიპა კანში ჩამჯდარი, მით უფრო იზრდება ინფიცირების ალბათობა. კიდევ ერთი დიდი შეცდომაა, როდესაც ნაკბენის აღმოჩენისას ადამიანები დაუყოვნებლივ იწყებენ სამედიცინო დაწესებულებისა თუ ქირურგის ძებნას. ამ დროს დროის დაკარგვა დაუშვებელია და არავითარი ქირურგიული ჩარევა არ არის საჭირო. თუ პინცეტი გაქვთ, ძალიან მარტივია მისი ამოღება – უნდა მოვეჭიდოთ კანთან მაქსიმალურად ახლოს და მთლიანად ამოვქაჩოთ. უკიდურეს შემთხვევაში, თუ ხელთ პინცეტი არ გაქვთ, მწერის მოცილება ხელითაც შეიძლება, მთავარია კანს მყარად მოვეჭიდოთ და მთლიანად ამოვაძროთ. მოცილების შემდეგ ნაკბენი ადგილი უბრალოდ სპირტით უნდა დამუშავდეს.
ტკიპას მოშორების შემდეგ იწყება კანის კონტროლის პერიოდი. ყურადღება უნდა მიექცეს სპეციფიკური, კონკრეტული ზომის სამონადირეო (სამიზნის ფორმის) გამონაყარის გაჩენას. მნიშვნელოვანია იცოდეთ, რომ ეს გამონაყარი შეიძლება გაჩნდეს არა მხოლოდ კბენის ადგილას, არამედ სხეულის ნებისმიერ სხვა ნაწილში და დროთა განმავლობაში გადაადგილდეს კიდეც. ასეთი სიმპტომის შემჩნევისას დაუყოვნებლივ უნდა მიმართოთ ექიმს. მაგრამ, ვინაიდან არსებობს უსიმპტომო ბორელიოზიც, თუ კანში ტკიპა გყავდათ, ანალიზის გაკეთება მაინც სასურველია. გაითვალისწინეთ, რომ კბენისთანავე ტესტის ჩატარებას აზრი არ აქვს, რადგან ინფიცირების დასადასტურებლად კბენიდან მინიმუმ ორი-სამი კვირა უნდა იყოს გასული.
