რატომ არ შეიძლება ბავშვის კვება მოძრავ ავტომობილში?
ბავშვის უსაფრთხოება მგზავრობისას ხშირად გვგონია, რომ მხოლოდ სწორად დამაგრებულ სამგზავრო სავარძლებსა და შეკრულ ღვედებზეა დამოკიდებული. თუმცა არსებობს ერთი მნიშვნელოვანი დეტალი, რომელსაც მშობლები ხშირად ნაკლებ ყურადღებას აქცევენ – ბავშვის კვებას მოძრავ ავტომობილში.
ერთი შეხედვით, უწყინარი ქმედებაა, სინამდვილეში კი შეიძლება სერიოზული საფრთხის გამომწვევი მიზეზი გახდეს. სწორედ ამიტომ პედიატრი, სოფიკო ფარულავა გვიზიარებს რჩევებს, თუ როგორ აიცილოთ თავიდან საფრთხეები და დაიცვათ პატარების უსაფრთხოება მაშინ, როცა ისინი ავტოსავარძლებში სხედან.
რატომაა საშიში ბავშვის კვება ქარსითში?
მოძრავ მანქანაში ბავშვის ძუძუთი ან ბოთლით კვება ნიშნავს, რომ ის უნდა ამოვიყვანოთ სამგზავრო სავარძლიდან, რაც გულისხმობს, რომ იმ დროს არსებობს შეჯახების ან მკვეთრი დამუხრუჭების რისკი, რომლებმაც შესაძლოა სერიოზულ ტრავმამდე მიიყვანოს თითოეული მგზავრი, მათ შორის – ჩვილიც. გარდა ამისა, ამ დროს ასფიქსიისა და დახრჩობის საფრთხე იზრდება; ბავშვს შეიძლება გადასცდეს საკვები, ხოლო გზაში სწრაფი რეაგირება და დახმარების გაწევა რთული აღმოჩნდეს მშობლისთვის.
როგორ მოვიქცეთ სწორად?
- პირველი ნაბიჯი მანქანის გაჩერებაა
თუ ბავშვს შია ან წყალი უნდა, გააჩერეთ მანქანა უსაფრთხო ადგილას. მხოლოდ ამის შემდეგ ამოიყვანეთ ავტოსავარძლიდან და მიაწოდეთ მისთვის საჭირო საკვები.
- შექმენი მშვიდი გარემო კვებისთვის
საჭმლის მიცემა მშვიდ გარემოში არა მხოლოდ უსაფრთხოა, არამედ ბავშვს ეხმარება შეისწავლოს ჯანსაღი კვების რიტუალიც წყნარ სივრცეში.
- წყლის მიცემაც იმავე წესით
ბევრმა შეიძლება იფიქროს, რომ წყალი უვნებელია, მაგრამ გადაცდენის რისკი სითხის მიღების დროსაც არსებობს, განსაკუთრებით – მცირეწლოვანებში.
შეიძლება თუ არა ხემსის მიცემა მოძრაობისას?
სოფიკო ფარულავას გვიზიარებს, რომ:
- 0–3 წლის ასაკის ბავშვებისთვის მგზავრობისას ხემსი საერთოდ არ არის რეკომენდებული;
- 4 წლიდან კი უკვე შეგვიძლია მივცეთ, მაგრამ მხოლოდ უფროსის მეთვალყურეობის ქვეშ. ამასთანავე, ასეთ დროს დაუშვებელია მარცვლოვანი და ძალიან წვრილი საკვების მიცემა, რადგან ისინი ყველაზე ხშირად იწვევს დახრჩობის შემთხვევებს.
ბავშვის კვება მოძრავ ავტომობილში შეიძლება მომენტალურად მოსახერხებელი ჩანდეს, განსაკუთრებით მაშინ, როცა შორ მანძილზე მგზავრობთ და გინდათ, რომ პატარა სწრაფად დამშვიდდეს. მაგრამ უნდა გაითვალისწინოთ, რომ ეს რამდენიმე წუთიანი კომფორტი შეიძლება გაცილებით დიდ საფრთხედ იქცეს. მოძრაობისას ბავშვი უფრო დაუცველია, რადგან ერთდროულად ირღვევა როგორც მისი ფიზიკური უსაფრთხოება (ქარსითიდან ამოყვანის გამო), ისე – კვების უსაფრთხოება (გადაცდენის და დახრჩობის რისკი).
მშობლის პასუხისმგებლობაა, იმოქმედოს არა იმპულსურად, არამედ გააზრებულად. რამდენიმე წუთით გაჩერება შეიძლება მოგვეჩვენოს გეგმების არევად, მაგრამ ეს შეიძლება იყოს ის გადაწყვეტილება, რომელიც ბავშვის სიცოცხლეს გადაარჩენს.
გაითვალისწინეთ, მგზავრობისას პატარების უსაფრთხოება ყოველთვის უნდა იყოს უპირველესი პრიორიტეტი. სერტიფიცირებული საბავშვო სავარძელი, სწორად დამაგრებული ღვედები და მხოლოდ გაჩერებულ მდგომარეობაში კვება – ეს სამი მარტივი წესი შეამცირებს რისკების წარმოშობას და მოგცემთ გარანტიას, რომ გზაზე თქვენი შვილი მაქსიმალურად დაცულია.
